PANNAKAKARIBUYOMI DAGITI BISUKOL

AGLAPLAPUSANAN a danum. Dayta ti gapuanan ti napigsa a tudo a nangrugi a naibuyat iti malem ti biernes, Oktubre 7, 2011, agingga iti malem ti sumuno nga aldaw. Saan ketdin a napigsa ti tudona iti sumuno nga aldaw agingga iti martes. Sa laeng nakalung-aw dagiti pagay iti huebes.

ITI DAYA NGA AMIANAN, ITI LAUD NGA AMIANAN KEN ITI AKINLAUD A DALAN A SUMREK ITI BARANGAYMI A NALAYUS

Napalalo manen ti wingiwing, sanamtek, ken panagkudkod ti ulo dagiti mannalon iti lugarmi (Balingit, Pamplona), kasta met iti kabangibang a barangay kas iti Nagattatan, ken iti dadduma a parte ti Bangan, Sanchez Mira. Timmaawen ti kataltalonanmi. Nagbalin a pannakapukpuklomi dagiti pagay ken pannakakaribuyomi dagiti bisukol ken pannakagakkami dagiti birabid.

ITI PANAGABBAT TI DANUM

Mapattapatta nga umabot iti 80 no di man 90 porsiento ti nalayus a pinagayan iti barangaymi.Kadagitoy a pagay ket kaaduanna ket nakadawan, apagdawa ken agbugbugi. Kaaw-awatanna ngarud a lugi manen dagiti pada a mannalon.

Arigna itakdangmon, maiyanud pay! Dayta ti kunkuna dagiti dadduma, ta ginuyod ti layus dagiti ginapasda a maibaut wenno mathresher koma iti sabado. Kadagiti met mabalinen a magapas, nababbabanto ti presioda gapu iti maris ti ladog a kimpet iti irik.

Nakas-ang ti napasamak. Ngem, ala, kasta ti biag dagiti mannalon. Gasanggasat! Ket sapay koma ta saanto a maigasanggasat dagiti inbati ti layus a maapitda kadagiti dadduma a negosiante iti irik a mananggundaway. Nababa ti panaggatangda wenno adda suitik ti kiloda.